~亞卡露力~ 玩吃遊

Day 4 宮崎-->熊本

原本計劃今天早上去"鵜戶神宮",但出發前睇天氣預報知道今天宮崎會下雨 ,亞卡露力怕來回鵜戶神宮的車程會延誤而影響旅程,並發現熊本"城彩苑エリア"今晚有夜影燈飾,唯有更改行程.所以亞卡露力今天可以遲一D起床,係酒店食一個免費早餐之後再出發,早餐雖然選擇並不多,有幾款飯團,漬物,炒蛋,麵豉湯,最後係亞力覺得好食的沙律醬拌麵,味道不錯.

今天的天色十分陰暗 ,還不時落大雨 ,幸好今天選擇在宮崎市中心逛街.

首先去"みやざき物産館"買宮崎特產做手信,這裏賣的宮崎特產有很多種類,細至醬油鹽,貴至宮崎牛都有得賣.

檢視較大的地圖

買完手信,就去附近的"宮崎縣廳"逛逛,但發覺無太大特別,而且又開始落雨,都係快D去有瓦遮頭的商店街逛.

宮崎市的街景真係令人感覺到有渡假的氣氛,沿途經過一間賣水果蔬菜的商店,發現D士多啤梨有卡露手掌心般大,便立刻買了,等待乘JR去熊本駅時食.

之後行去"宮崎牛APAS"附近逛一逛商場,在商場裏的supermarket見到宮崎特產日向夏,其實出發前亞卡露力在香港AEON的supermarket見到已經想買,不過覺得應該等到係宮崎先買,於是買了一袋日向夏回酒店食.

"宮崎牛APAS"係今天食午餐的店舖,分別有兩種形式烹調,第一種係有專人烹調的鐵板燒,價格比較貴,第二種係一般自己弄的燒肉,價格相對平一點.亞卡露力覺得食被日本人視為和牛之首的宮崎牛,當然要找專人烹調的鐵板燒.詳細資料可按宮崎牛APAS.

來到宮崎牛的出產地,當然要食價格比較貴的肉(因為覺得出產地應該比其他地方平 ),所以亞卡露力就選了"特選宮崎牛ヒレステーキランチ(里脊牛排)"及"特選宮崎牛サーロインステーキランチ(沙朗牛排)",並點選了一杯日向夏梳打及一杯蘋果汁,之後服務員告知亞卡露力有沙律吧可自行享用,過了一會廚師亦把餐湯送上.

廚師先將特選宮崎牛サーロインステーキランチ加少許鹽用鐵板烹調,分兩份後放在麵包上,送到亞卡露力面前,眼看麵包會將宮崎牛外面多餘的油份吸走,卡露夾一件食,整個口都充滿和牛的油香味,好味道但太油膩了,幸好還有煙肉炒芽菜韭菜及沙律菜,中和了油膩的感覺.廚師有留意亞卡露力差不多食完時(不要將麵包吃掉),便繼續烹調另一款特選宮崎牛ヒレステーキランチ,卡露食後覺得肉味比較濃,肉質鬆軟.最後廚師將剛剛吸收了和牛肉汁的麵包,做一個非常美味的麵包甜品.不過亞卡露力一致覺得鹿兒島Gyu do的熟成燒肉好味D.

之後亞卡露力乘14:15的JR去鹿兒島中央駅,返ソラリア西鉄ホテル取回小行李.

再乘17:03JR去熊本,其間可以食今早在宮崎買的士多啤梨,好大個,好多汁,好好味.

到了熊本駅,在車站內見到有個毛馬本駅,內裏有卡通人物及懷舊的裝飾,亞卡露力雖然唔識卡通人物,但係卡通人物太可愛了.出閘後,見到熊本市的吉祥物くまモン(熊本熊)及車站商店,商店有好多くまモン(熊本熊)的產品,之後經白川口去市電車站,途中又見到毛馬本駅,不過這毛馬本駅就簡單太多.

乘市電由熊本駅前去水道筋,再去酒店check in.

一下車已經見到酒店,今晚亞卡露力又係住東横INN,不過今次訂了價格平一點的經濟隻雙人房,可以與宮崎的房間比較一下.

入房間後,發覺只係張床細少少,無咗張小枱連櫈的地方,其他無太大不同,感覺一樣舒適,放下行李再出發.

首先去間叫"天外天"的拉麵店食少少野,唔好睇好似好少人,其實只係剛剛開門,天外天的營業時間由19:00~04:00(售完就關門).

亞卡露力叫了一碗拉麵加蛋,兩個人一齊食,因為之後去城彩苑エリア睇夜影燈飾,再去食晚餐(其實係卡露對拉麵興趣不大),拉麵師傅還貼心地比卡露一個小碗.拉麵一上來,首先聞到一陣蒜香味,眼看拉麵裏有三件叉燒,木耳,蔥及蒜粉.首先飲了一口湯,雖然湯面有一層油,但一點油膩的感覺都無,而且非常清甜順口及有很濃的豚骨味,令亞卡露力一口接一口的喝下 ,而麵質係亞力鍾意的細麵條,整體配合一流,好好味真係無得輸.離開前,亞卡露力看到拉麵師傅將雞放落滾湯中烹調,怪不得湯會有一種清甜的鮮味,原來係用豚骨雞湯底.

檢視較大的地圖

之後沿著"下通"一邊逛街一邊去城彩苑エリア.

途中亞卡露力見到賣生果蔬菜的店舖,忍唔住又買了兩包士多啤梨返酒店食.

終於到了城彩苑エリア,可能下雨的關係,有大部份商店都關門了,不過無阻亞卡露力繼續參觀.

逛了一會,雖然可以任意欣賞"夜影燈飾",並可遠觀晚上的熊本城,但係感覺十分冷清.

人影唔多加上天氣凍,逗留一陣就去食晚餐了,其實一路上亞卡露力都在討論,原本今晚去馬肉專門店菅乃屋的"菅乃屋ホルモン"食晚餐,不過亞卡露力仍然回味超好食的天外天拉麵,所以唯有放棄菅乃屋ホルモン (因明天的午餐都食菅乃屋),於是再度出發去食天外天拉麵.去到天外天門口已經有五,六個人排隊.

亞卡露力等了一會才可入坐,今次落單一人一碗拉麵,不過拉麵師傅好似認得亞卡露力(可能少外國人來食的關係),以為亞卡露力都係叫一碗兩個人食,又比卡露一個小碗,哈哈......之後亞力跟拉麵師傅示意是要兩碗拉麵,其間卡露見到旁邊客人的拉麵,碗面舖滿叉燒,亞力話原來餐牌另有一款貴一點的叉燒拉麵,不過擔心會食剩,所以都係選擇普通拉麵了.亞卡露力真心推介哩個天外天拉麵,有機會去熊本的朋友要去試試.

返到酒店後,又係時間食士多啤梨了,當然要試一下兩種的分別,左邊比較深紅色,入口香甜多汁,右邊相對淺色一點,入口竟然有啤梨(西洋梨)的香味,味道非常特別,與一般士多啤梨的味道不同,亞卡露力亦從未食過啤梨(西洋梨)味的士多啤梨,是否只有熊本先有得賣?!真想再買返香港比屋企人食.

可能今天整天不時下雨,令卡露有點兒著涼,幸好並無影響亞卡露力的心情,要早點休息了,因明天要去熊本城.